Օնկոլոգիայի կլինիկայում բուժում են ստանում բոլոր տեսակի սոլիդ չարորակ նորագոյացություններով հիվանդները։ Կիրառվում են հակաուռուցքային դեղորայքային բուժման ժամանակակից տեսակները՝ քիմիաթերապիա, թիրախային թերապիա, իմունոթերապիա և հորմոնալ թերապիա՝ համապատասխան ամերիկյան և եվրոպական նորագույն ուղեցույցների։

Կլինիկան բաղկացած է ամբուլատոր և ստացիոնար բաժիններից։ Ամբուլատոր բաժնում հիվանդներն իրենց բուժումը ստանում են հատուկ նախատեսված քիմիաթերապևտիկ բազկաթոռների վրա։ Ստացիոնար բաժանմունքը իր մեջ ներառում է հարմարավետ կահավորած առանձնասենյակներ, որտեղ բուժումը ընթանում է մաքսիմալ կոմֆորտ պայմաններում։

Դեղորայքի պատրաստումը իրականացվում է պրոցեդուրային սենյակում հատուկ քարշիչ պահարանների մեջ, որոնք պաշտպանում են բուժանձնակազմին և հիվանդներին քիմիաթերապևտիկ դեղորայքի վնասակար ազդեցություններից։ Բուժման ընթացքում հիվանդները և նրանց հարազատները ստանում են հոգեբանական աջակցություն և պալիատիվ օգնություն ցավային սինդրոմի կապակցությամբ։

Կլինիկան հանդիսանում է Երևանի պետական բժշկական համալսարանի ուռուցքաբանության ամբիոնի բազա։ Այստեղ ուռուցքաբանություն են սովորում թե՛ 5-րդ կուրսի ուսանողները, թե՛ ուռուցքաբանության կլինիկական օրդինատորները, որոնք շատ ակտիվ ներգրավված են կլինիկայի առօրյա աշխատանքի մեջ։ Բաժանմունքի բժիշկները պարբերաբար վերապատրաստումներ են անցնում եվրոպական երկրների և ԱՄՆ-ի օնկոլոգիական առաջատար կլինիկաներում և մասնակցում են միջազգային կոնֆերանսների, ինչպես նաև հանդիսանում են ESMO և ASCO ուռուցքաբանական ասոցիացիաների անդամ։